اغن الكفي ول بوسيف

السلام عليكم لاه انضيف شي من اغن الاديب الكبير الكفي ول بوسيف

لِحْتْ العينْ اعْلَ التِّيوْشَاتْ	واعْلَ بَخْواكًَ وانْزْواتْ
ظلت دمعتها ما ارْكًاتْ	لازِمْها تَعْرَفْ لامَ
بيهم تِلْتَمْ ولا اتْلاتْ	تِلْتَمْ إلى القِيَامَ

وله

يَبْرَكًْ شَيَّرْتْ ألا بِشَّوْرْ	ذاك امْن التِّشْيارْ ارْخِ بيه
خالكً يَلبْركً ذاك الشور	وانَ زادْ ألَّ عالِم بيه
شَيَّرْتْ و شَيَّرْتْ ولا جَيْتْ	يزَّاك امن التشيار اعْيَيْت
اعرفنا ذاك الِّي وَسَيْتْ	ذاك الي لِ شَيَّرْتْ اعْلِيهْ
فرظ انواسيه إلا كًدَّيْت	وِيلَ ما كًدَّيْتْ انواسيه

وله

خَشْمْ إيدَارْ وعِكْلْ آوْكارْ	وكًَلْبْ انكًادِ وانْوَاوْدَارْ
دَارُو فِلْكًَلْبْ الي انْدارْ	منهم رُوحي مَمْكُونَ
بين الدِّخْلْ وكًَلْبْ آدْمَارْ	وأجَمْلْ وخشم اكًْرونَ
تشواش اعيالي ما امركًْ	كًَلْبِ وِلْ دَلالي احْرَكًْ
وِلِّ لَمَّ اللَّ يِفْتْرَكًْ	لَخْلاكًْ ألا مَمْكُونَ
مَخلُوكًْ افتيرس مِنْصْرَكًْ	دارُ كانت زَكًْنُونَ
شوفتْ بو عِشْ وبِدْرَكًْ	تِغسِلْ منهم تَفُّونَ
لِهْرُوبْ الَّ كًبْلْ اللحوكًْ	أمَّ روصْ المَامُونَ
نختيروهُمْ عن فُمْ زُوكًْ	قيرْ الوَطْيَ مَضْمُونَ

وله

لَحْكًِتْنِ حِلَّ دَهْرْ انْجيهْ	مانِ فيهْ الْ بَيْكًِ سَمَّاعْ
وعِت انْرِفْ اعْليهْ ونِبْقِيهْ	ونِشْريهِ إيلَ رَيْتُ ينباع
قَلاَّتْ اعْلِيَّ حِلَّ رَدْ	ما كان اعْلِيَّ يَقْلَ بَعْدْ
لِبْتَيْتْ وياسر ما يِنْعَدْ	وانَ سابكًها يَشَّفَّاعْ
ماكنتْ انشِكْ انُّ اتْلَ حَدْ	اعْلَ حَدْ إيقَلِّ شِ كًاعْ
كًطْ اكًبَلْ مِتْكِنْتْ ومِتْكِنْتْ	وتَمَّيْتْ الاَّ بِكًسَايَ كِنتْ
قَيرْ انسِقْتْ الْ حِلَّ وانْطِعْتْ	واكًبِلْ عَكًلِ زاد التِّطْواعْ
وانَ ما كًطْ انسِقْتْ وطعْتْ	وعَكًلِ مَا كًطْ انْسَاقْ وطَاعْ

وله

مَحَد الدِّنْيَ مايْلَ	شَوْرَكْ و اعْليهَ مايِلْ
أعلم بعد انهَ زايْلَ	وانتَ وَيَّاهَ زايلْ
مَذَ مِنْ حَد اشْتَاكًْهَ	واجمعْها بعدْ افْرَاكًْهَ
مِلكْ اذهبْهَ وانياكًْهَ	تِمِرْكَاتِنْ واشْوايِلْ
خَلْطْ الدِّكًْ امْعَ احْكًاكًْه	و ارْفِدْ فيهَ لِكًْوايلْ
وامْشَ عنهَ ما ظاكًْه	قَيْرْ آنَ ذَلِّ كًايِلْ... محد الدني
فَاتُ مِلْكُوهَ لَوْلِينْ	الِّ مِلْكُوهَ مُلكْ زَيْنْ
وعَكًبت فَيْدْ التالْيينْ	هَاذوكْ ارْحايلْ وانزايل
قَيْرْ ألَّ يِمْشُ كاملينْ	عنهَ مَشْيتْ لَوايلْ

هذه الطلعة جايبه صاحب الوسيط عنه للكفي وبعض الرواة ينسيه لشيخن ول امبالة
وان بعد ما نعرف

إلِّ جِدْبُ رَيْظَ	واحْزِيمُ ما يَبْرَ
تِيمُجَيْجْ البَيْظَ	ؤتِيمُجَيْجْ الْخَظْرَ

من باب اخروجو تمجيج البيظة تنجبر فزوان شور من اشوار لكتري



لي عودة ان شاء الله

المصدر: شبكة منتديات الوطن الموريتانية - من قسم: زاوية عمالقة الأدب الحساني

---

hyk hg;td ,g f,sdt

براني

اسكى بيك

نعرف عنك اتبارك الله مرست

اغن الكفي التمراس الزين

يغير طلعة لبرك هي والل كافها مانعرف ايهم

كنت امواسيه العبد الرحمن ول المبارك

تـــــــــحياتى

الأخ الكريم براني شكرا جزيلا لك على الهدية القيمة والمجهود الرائع... استمتعت بعبق الأدب الأصيل في هذه المشاركة النوعية ، تقبل أسمى تحياتى

هذا الكاف امل للكفي:

يَلاَّلَكْ يَلْكَفْيَ
	هَذِي الشَّمْسْ ادَّلاَّتْ
لا إلهَ نَفْيَ
	إلا اللهُ إثباتْ

ويكول باط يرحمه اطلع الشهيرات:

يالعكًل اكًدِمْ نافِدْ لِبَّيْرْ
	يكانك لسقام اهَنُّوكْ
ألا حاسيك وفيه الخير
	مبروك وعندو منت ابروك
منصاب المبدوع ورَدَّامْ
	وعلب النص وزيرت لغمام
هُومَ وانواتيلْ أنَجَّامْ
	وأقَنْكًَسْ وابَّيْراتْ الشوك
ما فيهم واحد فيه اخيام
	ما عادت فيهم منت ابروك
منصاب اعْكًِدْ ظايتْ لِكًْنَدْ
	واعلاب الحاسِ والْمَرْفَدْ
واحْرَاكًِفْ لبيارْ ولَمْلَدْ
	يَمنصابْ امَّلِّ هَذوكْ
ما فيهم واحد عندو حد
	ما عادت عندو منت ابروك

مرحب سيدن ان كط اسمعت عنه للكفي وتنكال عنه بقصته
عن ركب نو عل الحوض وذاك الزمن الكفي فتكانت
ولا نعرف بعد

اعد بغل لغياد
	فاول ذيك الكمر
افمجر ذاك الواد
	سعد امك ي المجر

مِنْ مَارِتْ عَنْ خَبْرِكْ خَفِيفْ
	يَالدِّنْيَ وانِّكْ مَانِكْ دَارْ
مَلْزَمْ بُسَيْفْ ألاَّبِالسَّيْفْ
	فَاصِلْتُ مِنْ مَلْزَمْ لِحْبَارْ
ألاَفَاصِلْتُ مَاهُ بِالسَّيْف
	لَمْلَدْ لِكْبِيرْ الْفَوْكُ دَارْ

المشاركة الأصلية كتبت بواسطة سيدن

هذا الكاف امل للكفي:

ويكول باط يرحمه اطلع الشهيرات:

يلال مزين هذا

اسكييييييييييييييي الكفية اطفل افلااااااال
شكرا للجميع